कराड दक्षिण विधानसभा मतदारसंघ – २६० हा महाराष्ट्र राज्य विधानसभेच्या २८८ मतदारसंघांपैकी एक आहे. लोकसभा आणि विधानसभा मतदारसंघ परिसीमन आदेश, २००८ नुसार केलेल्या मतदारसंघांच्या रचनेनुसार, कराड दक्षिण मतदारसंघात सातारा जिल्ह्याच्या कराड तालुक्यातील कोळे, उंडाळे, काळे, शेणोली, कराड ही महसूल मंडळे आणि कराड नगरपालिका क्षेत्राचा समावेश होतो. या विधानसभा मतदारसंघाचा सातारा लोकसभा मतदारसंघात समावेश होतो. कराड दक्षिण हा महाराष्ट्रातील एक महत्त्वाचा मतदारसंघ आहे. या मतदारसंघातील लोकांचा प्रमुख व्यवसाय शेती असून, बहुतांश लोक शेतीवरच अवलंबून आहेत. त्यांचे जीवन ग्रामीण संस्कृतीशी जोडलेले आहे. महाराष्ट्राच्या जडणघडणीत मोलाचे योगदान देणारे आधुनिक महाराष्ट्राचे शिल्पकार स्व. यशवंतराव चव्हाण साहेब, आपल्या विचारांनी समाजाला विधायक दिशा देणारे थोर विचारवंत स्व. यशवंतरावजी मोहिते (भाऊ) आणि सहकार, शिक्षण, आरोग्य अशा विविध क्षेत्रात आपल्या देदीप्यमान कामगिरीतून कृष्णाकाठी नंदनवण फुलवणारे सहकारमहर्षी स्व. जयवंतरावजी भोसले (आप्पा) यांच्या कार्यकर्तृत्वाने कराड दक्षिणचा परिसर सुजलाम सुफलाम झालेला आहे. या महनीय नेत्यांच्या पाऊलवाटेवरून आ. डॉ. अतुलबाबा सुरेश भोसले वाटचाल करीत आहेत.